លំហាត់ប្រាណទាំង 6 សម្រាប់អ្នកជំងឺទឹកនោមផ្អែម

តើអ្នកដឹងទេថា លំហាត់ប្រាណមានប្រយោជន៍ជាពិសេសសម្រាប់អ្នកដែលមានជំងឺទឹកនោមផ្អែម? លំហាត់ប្រាណបង្កើនប្រសិទ្ធភាពរបស់អាំងស៊ុយលីន និងរក្សាកម្រិតជាតិស្ករក្នុងឈាមមិនឱ្យឡើង។

 លំហាត់ប្រាណក៏ជួយសម្រកទម្ងន់ និងបង្កើនតុល្យភាព ដែលនេះជារឿងសំខាន់ ព្រោះអ្នកជំងឺទឹកនោមផ្អែមប្រភេទទី 2 ច្រើនតែប្រឈមនឹងការធាត់ខ្លាំង និងដួល។ ទាំងនេះ គឺជាលំហាត់ចំនួន 6 ដែលអ្នកអាចបញ្ចូលក្នុងជីវិតប្រចាំថ្ងៃបានយ៉ាងងាយស្រួល។ អ្នកត្រូវប្រាកដថាបានពិភាក្សាជាមួយគ្រូពេទ្យ មុនពេលចាប់ផ្តើមធ្វើលំហាត់ប្រាណណាមួយ ហើយហាត់បន្តិចម្តងៗនៅពេលដំបូង។ អ្នកអាចបង្កើនរយៈពេល និងកម្រិតនៃការហាត់បន្តិចម្តងៗ។ 

🏃ការដើរ

ការដើរ ជាសកម្មភាពមួយដែលត្រូវបានណែនាំបំផុតសម្រាប់អ្នកជំងឺទឹកនោមផ្អែមប្រភេទទី 2 ។ ការដើរលឿនក្នុងល្បឿនដែលធ្វើឲ្យបេះដូងលោតញាប់ ជាលំហាត់ប្រាណអាអេរ៉ូប៊ីក (aerobic)។ ការសិក្សាបញ្ជាក់ថា អ្នកជំងឺទឹកនោមផ្អែមដែលហាត់អាអេរ៉ូប៊ីក (aerobic) យ៉ាងហោចណាស់ 3 ថ្ងៃក្នុងមួយសប្តាហ៍ឱ្យបានសរុប 150 នាទីមានសុខភាពប្រសើរឡើង។ យោងតាមសមាគមជំងឺទឹកនោមផ្អែមអាមេរិក អ្នកជំងឺទឹកនោមផ្អែមមិនគួរអសកម្មនោះទេ ពោលគឺមិនធ្វើលំហាត់ប្រាណបែបអាអេរ៉ូប៊ីក (aerobic) លើសពី 2 ថ្ងៃជាប់ៗគ្នា។ 

🙏 ថៃជី 

ក្បាច់គុនចិននេះត្រូវបានអនុវត្តជាច្រើនសតវត្សហើយ និងត្រូវបានគេស្គាល់ថាមានប្រយោជន៍សម្រាប់សុខភាព។ វាមានការធ្វើចលនាជាបន្តបន្ទាប់ ក្នុងលក្ខណៈយឺតៗ និងសម្រាក។ ថៃជី គឺល្អសម្រាប់អ្នកជំងឺទឹកនោមផ្អែម ព្រោះវាជួយឲ្យរាងកាយសមសួន និងកាត់បន្ថយភាពតានតឹងក្នុង សកម្មភាពតែមួយ។ ថៃជីក៏ធ្វើឱ្យតុល្យភាពប្រសើរឡើង និងអាចកាត់បន្ថយការខូចខាតសរសៃវិញ្ញាណ ដែលជាផលវិបាកនៃជំងឺទឹកនោមផ្អែម។

🏋 ការលើកទម្ងន់

ការលើកទម្ងន់បង្កើនម៉ាសសាច់ដុំ ដែលសំខាន់សម្រាប់អ្នកជំងឺទឹកនោមផ្អែមប្រភេទទី 2 ព្រោះម៉ាសសាច់ដុំជួយរក្សាកម្រិតជាតិស្ករក្នុងឈាម។ ជាផ្នែកនៃផែនការគ្រប់គ្រងជំងឺទឹកនោមផ្អែម អ្នកជំងឺគួរលើកទម្ងន់យ៉ាងហោចណាស់ 2 ទៅ 3 ដងក្នុងមួយសប្តាហ៍។ ការសម្រាកក៏សំខាន់ដែរ។ អ្នកគួរតែមានថ្ងៃសម្រាក នៅចន្លោះថ្ងៃហាត់លើកទម្ងន់ (អ្នកអាចហាត់ប្រាណប្រភេទផ្សេងទៀតបាននៅថ្ងៃសម្រាកនេះ)។ 

យូហ្គា

យូហ្គាជួយកាត់បន្ថយជាតិខ្លាញ់ក្នុងខ្លួន បន្ថយភាពធន់នឹងអាំងស៊ុយលីន និងធ្វើឲ្យមុខងារសរសៃវិញ្ញាណប្រសើរឡើង ដែលទាំងអស់នេះមានសារៈសំខាន់ចំពោះជំងឺទឹកនោមផ្អែមប្រភេទទី 2។ យូហ្គាក៏អស្ចារ្យផងដែរក្នុងការកាត់បន្ថយភាពតានតឹងដូចជា ថៃជី។

ការហែលទឹក

ការហែលទឹក៖ លំហាត់ប្រាណបែប aerobic នេះមានអត្ថប្រយោជន៍ជាពិសេស គឺល្អចំពោះជើង បើធៀបនឹងការដើរ ឬរត់តិចៗ។ វាល្អសម្រាប់អ្នកជំងឺទឹកនោមផ្អែម ដែលត្រូវជៀសវាងរបួសជើងគ្រប់ប្រភេទ។

 របួសជើងលើអ្នកជំងឺទឹកនោមផ្អែមមានការជាសះស្បើយយឺត ដោយសាតែលំហូរឈាមនៅក្នុងសរសៃឈាមតូចៗនៅផ្នែកចុងបំផុតមានការថយចុះ ហើយកម្រិតជាតិស្ករក្នុងឈាមឡើងធ្វើឱ្យងាយនឹងឆ្លងមេរោគ។ ការហែលទឹក ល្អសម្រាប់អ្នកជំងឺទឹកនោមផ្អែមប្រភេទទី 2 ដែលធាត់ ព្រោះវាជួយសម្រាលសម្ពាធលើសន្លាក់ និងអនុញ្ញាតឱ្យធ្វើចលនាដោយសេរី និងងាយស្រួល។ 

ជិះកង់ហាត់ប្រាណ

ការជិះកង់ហាត់ប្រាណបែប aerobic ពង្រឹងបេះដូង និងធ្វើឱ្យមុខងារសួតប្រសើរឡើង។ ការជិះកង់ហាត់ប្រាណនៅមួយកន្លែង អាចជិះបាន ទោះអាកាសធាតុបែបណាក៏ដោយ មិនដួល ហើយមិនធ្វើមានរបួស។ ការជិះកង់ធ្វើឱ្យលំហូរឈាមនៅជើងប្រសើរឡើង ដែលជាប្រយោជន៍ជាពិសេសសម្រាប់អ្នកជំងឺទឹកនោមផ្អែម ហើយសកម្មភាពនេះក៏ជួយរក្សាទម្ងន់របស់អ្នកឱ្យសមស្រប។